Item, di armar 4 altre galie sotil, et have tutto il consejo. Et fazendosi el scrutinio di provedadori, leto la lettera di Corphù, quali voleno armar 60 gripi, fici notar una parte di acetar la sua oferta, et leta a li savii parse tutti de intrar in opinion, quali fono sier Filippo Trum procurator, sier Constantin de Prioli, sier [843] Nicolò Foscarini savii dil consejo, sier Francesco Trum, sier Alvixe Venier, sier Zorzi Corner el cavalier savii da terra ferma, io Marin Sanudo, sier Zuam Trivixan et sier Vetor Capelo savii ai ordeni, et cussì metessemo di scriver al rezimento di Corphù debi acetar ditta oferta, et armar quelli gripi, darli il pam et munition, et ringraciarli. Et che 'l sia scrito al capitano zeneral che zonti sarano ditti gripi a lui, li doni ducati uno per uno, overo quello li parerà; et sier Marchio Trivixan savio dil consejo messe che 'l sia scrito al zeneral di tal oferta, et piacendoli li debi far armar, et andò in renga, et parlò contra la nostra parte dicendo era stà capitano zeneral, et dispresia li gripi in armada, et io Marin Sanudo, ita volendo li altri savii, andai a defender l'opinion nostra, dimostrando il numero grande di l'armada feva al proposito nostro con molte raxon, licet non fussi maritimo; mi rispose sier Andrea Zanchani, et si scusò haver refudà provedador in la Morea, poi parlò sier Vetor Capelo, et fo la prima volta, disse poche parole, demum sier Marco Morexin fo in Caodistria, era sora le pompe, parloe laudando l'opinion nostra, et sier Polo Barbo el consejer intrò in la opinion dil Trivixan, acciò la sua parte andasse avanti, et sier Fantin da Pexaro consejer intrò in la nostra, et il Barbo fè che sier Vido Caotorta consejer vice doxe intrò in la sua, tamen vadagnassemo: zoè do fo non sincere, una di no, 73 quella di do consejeri et dil savio dil consejo, 91 la nostra, et fu presa; et fici far le lettere a Corphù statim.