Ordeni mandati per il capitano zeneral a Corphù.
     
      Primo, pona tutte le biave in Corphù, lasando solum el manzar per li populi.
      Item, fazi empir le cisterne di acqua.
      Item, ruini lì alcune caxe zoè tutte quelle sono al monte de ... et portino dentro i legnami.
      Item, mandi fuora di la terra tutti i zudei, e volendo quelli andar in Puja o altrove li dagi i navilii.
      Item, mandi fuora tutte le zente inutile.
      Item, si li manda 200 barili di polvere e do passavanti, le qual cosse erano deputade di mandar in Cypro.
      Item, si li manda Jacomo di Tarsia con 50 [873] provisionati, et che sia capitano di le fanterie justa i mandati di la Signoria nostra.
      Item, si li manda maistro Piero, englese, bombardieri con altri.
      Item, si li comete fortifichi la terra dove bisogna.
      Item, si habi advertentia perché dubita il Turcho, habi tratato.
     
      El ditto capitano da Modom, di 12. Scrive esser zonta la galia Leza, la Tajapiera, la Lusignana, quella di Trane, quella di Zara, nova, et quella di Arbe. Item, à retenuto la nave di sier Francesco Malipiero, el cavalier fo di sier Perazo; lauda il tuor di gripi, justa l'offerta fata per quelli di Corphù al baylo, e armarli. Item, aricorda a la Signoria il remandar in armada le galie venute di Fiandra; prega s'ingrossi l'armada e si mandi el bisogno. Le qual tutte provision erano zà stà fate.
     
      Di sier Alvixe Marzelo, capitano di le nave, data a dì 12 zugno a Sapientia. Come le nave sono lì con lui, havia auto mandato dal capitan zeneral non si parti, e cussì resterano lì, fanno provision perché si ha el Turcho vien con l'armada a Corphù. Item, esser li queste nave, zoè la soa, la Zustignana, la Gradeniga, la Grimana e Malipiera, et era il capitano con 17 galie.