Et che adì 7 di questo, lì a Udene, doveano far certo consulto con quelli castelani. Et ha fato comandamento a tutti i vilani di castelli di la Patria siano in hordine con le arme. Fu, posto per li savii dil consejo, di terraferma e ai ordeni: di scriver al capitano zeneral, et dargli autorità vedendo il partio bello di dar adosso a l'armada turchescha, et metemo di questo in soa libertà insieme con li provedadori, havendo perhò a mente la conservation etc. Have una non sincera, 11 di no et 161 di la parte e fu presa; et fate le lettere di tal mandato in zifra doman fo mandate via.
     
      Item, fo messo, per li savii di consejo e di terra ferma, la commision a sier Andrea Zanchani provedador zeneral in la Patria, de more, e fu presa.
     
      Item, fu messo, per li ditti, di condur per un altro anno el signor Bortolo d'Alviano, el signor Carlo Orsini, et uno di rispeto in libertà di la Signoria nostra, con li modi e condition havia; et dita parte non have niuna di no e niuna non sincera, tutte fo de la parte.
     
      Item, fu posto, per li savii tutti e nui ai ordeni, la comision a sier Francesco Zigogna, va provedador in la Morea, e datoli auctorità in zivil e criminal; non fu contradita et have tutto il consejo.
     
      Item, fu posto, per tutti nui savii, de interzar i dacii da dì 8 lujo in là, exceto il dacio del vin, becaria, pistori, et le do per 100, i qual danari siano posti a la guera; e dita parte fo leta per il principe, consejeri, cai di XL e tutti li savii dil collegio; et sier Polo Barbo el consejer volse etiam fusse exceptuato el soldo per ster di l'intrada dil formento qui, ch'è ducati 1300 a l'anno.