Item, di l'orator dil Turcho venuto a Pexaro, va a Milan a dimandar ducati 200 milia promessi al Signor, perché el venga a' nostri danni, le qual tutte cosse dovesse dir al papa. Have la parte 10 di no, et resto dil consejo di sì.
     
      Item, fo fato scrutinio di uno savio dil consejo, in luogo di sier Alvixe Bragadin procurator non era intrado, rimase nuovo sier Marin Liom, fo capitano a Padoa, have 107, et fu soto sier Nicolò Liom procurator fo savio dil consejo, 97, sier Domenego Trivixam el cavalier, 95, et sier Hironimo Zorzi el cavalier, 73, et introe.
     
     
      Copia di la lettera di la Signoria nostra scrittaa li rectori di terra ferma per il sussidio cristiano.
     
      Augustinus Barbadico Dei gratia dux Venetiarum etc. Nobilibus et sapientibus viris Marco Bollani, de suo mandato potestati et capitaneo Paduae, fidelibus dilectis salutem et dilectionis affectum.
      A tutti è nota la grandeza et graveza de le spexe che al presente sostien la Signoria nostra per la importantia de le occorentie de le cosse maritime, le qual sono de qualità che apresso grande somma de oro erogado fin hora recerchano maxima quantità de danari, sì per poder continuar la presente spexa come per suplir a le altre che in dies acaderano, secondo le occorentie di tempi per conservation dil stado nostro et universal beneficio di subditi nostri, fortune et facultà lhoro. Unde atrovandose al presente questa cità nostra gravata da decime, et altre assai angarie in publico et in particulare di cadaun citadin nostro, ne par ben rasonevole et conveniente che le fidelissime cità et lochi nostri de terra ferma in questa religiosa expedition debino socorer la Signoria nostra de alcun subsidio, come membri al suo capo, et come altre volte alacri animo in simel casi hanno facto, et se rendemo certissimi in questa urgentia farano per la fede lhoro et devotion verso la Signoria nostra, la qual sempre afectuosamente defende el nome cristiano et la vita, libertà et facultà universal del stato et subditi nostri.