Item, avisa di l'orator di Milan, passò con assà cavalli per andar a esso re a pacifichar con sguizari, et di tre bandiere di alemani sono andate a Slander da' sguizari.
     
      Da Trevixo, dil podestà, di 19. Come haveano comenzato far li exatori per scuoter il limitado per il sussidio, etc.
     
      Da Brexa, di rectori, di 19. Come vano drio scodando il subsidio, e mandano lettere abute da Pontevico.
     
      Da Pontevico, di sier Francesco Valaresso, castelan a la Signoria nostra, di 18; et di Zuam di Feltre contestabele ai rectori di Brexa in conformità. Come el conte di Cajazo, eri si levò di Rebecho per andar a Cremona, poi Bordolam va in Soresina, farà la mostra, et vien a Sonzin misier Francesco Bernardin Visconte con cavali 800, et a Rebecho misier Scaramuza Visconte, à mandato a saper il tutto.
     
      Da Cataro, di sier Francesco Querini, rector e provedador. Vechia, in recomandation de quelli contestabeli sono lì, non hanno da viver, prega siano sovenuti.
     
      Fu balotà alcune munition per Curzola, dove è conte sier Alvixe Balbi.
     
      È da saper in questi giorni in quarantia criminal sier Hironimo Capelo, come stato provedador per le camere con autorità di avogador, menoe sier Francesco Corner, q. sier Zuane, fo camerlengo a Padoa, per haver tolto assà danari di quella camera e convertiti in suo uso, et prese di retenirlo; et poi etiam Andrea de' Usnagi era scrivan a quella camera, e tutti do si presentono a le prexon: tochò il collegio a sier Luca Pixani e sier Andrea Cabriel consejeri, sier Filippo Minio cao di XL, esso sier Hironimo Capello et sier Francesco Griti, et sier Beneto Belegno signori di note.