Item, scriver a l'orator nostro è a Milan togli licentia dal ducha, et li dichi per sue facende vien via. Or andò in renga Leopoldo Loredam procurator savio dil consejo dicendo non era tempo di far queste moveste, per non esser in hordine. Li rispose sier Filippo Trum procurator, fo longo, et disse ben mal; poi sier Alvixe da Mula savio a terra ferma contra l'opinion dil Trum, demum [952] sier Lorenzo di Priuli fo avogador parloe, dannò in la prima parte far sguizari et in la segonda il levar di l'orator pro nunc, unde sier Filippo Trum sì in far de' sguizari come dil levar di l'orator si remosse. Et andate le parte, una fo non sincera, di no tre, dil Trum 84, dil resto di savii 93, et questa fu presa; et fo comandà di questo stretissima credenza, per esser importante.
     
      Fu posto, per tutte tre man di savii, scriver al provedador di Cataro che in nomine dominii acepti quelli di Zupa et Montenegro con li capitoli honesti che a lui par, et mandi Alvixe Sagudino secretario a Dulzigno lì; ma el consejo comenzò a mormorar, et io non mi pareva fusse tempo, et volsi contradir, adeo d'acordo tutti terminono de indusiar a meter questa parte.
     
     
      [1499 07 23]A dì 23 lujo. In collegio. Vene el signor Bortolo d'Alviano, et disse era pronto andar a' servicii di la Signoria nostra, dimandò tre page, et danari per meter a cavallo 30 homeni d'arme di soi unde fu balotato darli le tre page, et ducati 200 per li cavalli mancha.
     
      In questa matina fici expedir munition per Caodistria, Zara, Spalato, Traù, Budua, et a li oratori di Curzola senza esser alditi rispondemo eramo contenti non armarli per il presente.