Avisa l'adunamento di zente di la Signoria in Friul sotto specie contro turchi; per tanto lui voria la rocha di Trieste in le man sue, et haver più autorità di quello ha de lì; et che la Signoria armava barze per quel golfo, et à mandato monition in Istria et a Mocho, et che ivi à mandà per formenti in la Marcha, et posti dentro la terra, nomina il castelan dil castello di Trieste chiamato Rauberg. In conclusion zerchava meter mal et sospetto tra esso et la Signoria, et questo a instantia dil ducha di Milan.
     
      Ancora era, con ditte lettere andava in Alemagna, alcune lettere scriveva il ducha a li soi comessarii di Geradada, a quel di Pandino nominato domino Almerigo di Sanseverino, a quel di Caravazo et al podestà di Trevì et a misier Francesco Bernardin Visconte, et la caxon, era con ditte lettere, fu che Dio volse ne venisseno in le man, et di eror le messe in lettere di Alemagna, overo il corier si dimenticò [1000] lassarle dove andava, in le qual lettere el ducha avisa molte cosse, et scrive a uno de' ditti comessari quello à fato francesi a li do castelli preseno, et che uno Zuam Antonio ... havia corso su quel di Monferà, et fato danno per ducati 1500. Item, concludo ditto ducha sta mal, à solum cavalli 6000, e zà franzesi ne ha 8000 senza queli arà la Signoria nostra, che sta ben intender.
     
      Et etiam era con ditte lettere intercepte, la risposta fata a dì 29 in scriptis havia ditto il ducha a sier Marco Lipomano el cavalier orator nostro quando tolse licentia, molto longa, si duol di la Signoria etc.