Item, sier Simon Guoro provedador con le galie era venuto di Napoli, et era restato a Napoli solum la galia barbariga di Candia, la qual impalmava; e haveano conduto in armada Zanon da Colorgno e Schiaveto con fanti ... Item, erano tornate le tre galie mandò con sier Nicolò da cha da Pexaro provedador a Caomalio. Item, haver nova, per lettere da Malvasia, sora cao Matapan esser l'armata turchescha, la qual pocho lontan dovea esser di la nostra, di velle 240 in 250, le galie andavano a terra via, e le nave largo in mar navegavano, et era ditta armata 80 galie sotil, el resto palandarie e schierazi, nave grosse 5, tre galeaze, el resto navete di 200 fin 300 botte numero 20, siché ozi sarà propinqua a la nostra. Et che lui capitano si ha tirato largo in mar, con l'armada in hordine, a presso Sapientia per star su l'avantazo, spera, etc. E poi scritta à aviso da Corom ozi haver vista dita armata velizar, la qual per esser mia 40 lontan da la nostra, sta di bon animo, tutti ha fato ogni provision, etc. Item, scrive di la nova have dal rector di Legena dil naufragio di ditta armada, pur ora sta qual cossa, ma non troppo, siché avisava questo a Corphù.
     
      Da Corfù, di 29. Scriveno l'armata nostra esser fin quel dì 24 lujo velle 90, zoè galie sotil 44, grosse 14, nave 25, fuste 4 e gripi 3. Item, haver [1046] l'armata turchesca esser mal in hordine, spera contra questo can harà vitoria. Lhoro a Corphù ha fato ogni provision, ha fato principiar li formenti e le anime redursi in la terra, ruinar caxe, spianar il monte, voriano danari per questo, et uno inzegner, et haveano fato per sestieri ruinar senza spesa di la Signoria nostra.