Item, acerta todeschi esser inimici de' italiani, et il conte Paladin fa guerra con l'arziepiscopo di Magonza, et il marchexe di Brandiburg, etiam fa con le terre franche guerra. Item, che ditto orator veniva a Venecia, poi va a Zenoa per passar in Spagna, et ozi è partito per Verona, si duol, et disse la Italia sarà lacerata da alemani per esser assa' numero. Item, esso podestà à di novo el campo di Venosa, esser solum homini 8000, et stanno in arme dubitando de' agnelini che dicono voler venire a trovarli. Item, per merchadanti tornati da la fiera di Brunsvich disse si divulga la paxe esser fata tra il re et sguizari exepto la liga grisa et agnelini, et dicono che todeschi fata la prima paxe verà a' danni di la Signoria nostra, et più volte à scritto il bisogno di quella terra.
     
      Da Feltre, di sier Mathio Barbaro, podestà, et capitano, di 19. In conclusion non esser certa la nova di la paxe, come scrisse per avanti, imo par tal nova da quelle bande esser sferdita.
     
      In questo pregadi, prima fusse posto alcuna parte, fo fato il scurtinio di un savio dil consejo in luogo di sier Marco Antonio Morexini el cavalier, è andato provedador in campo, et rimase sier Domenego Trivixan el cavalier fo podestà a Brexa 106, sier Hironimo Zorzi el cavalier 87 fu sotto, et sier Lorenzo di Prioli 92, sier Piero Balbi 69, et sier Alvixe da Molin 62, et introe subito romaso. Item fo fato un savio a terra ferma in luogo di sier Hironimo Zorzi el cavalier: aricordo rimase sier Marco Zorzi fo savio a terra ferma 109, sier Leopoldo Grimani non passò, etiam lui intrò subito.