Have 35 di no, 145 di la parte.
     
      Posto, per li ditti savii, dar a Coltrim inzegner ducati 20 al mexe di provision, da esser pagati a la camera di Brexa, con questo vadi dove bisogna a so spexe; fo gran murmorar nel consejo, have 76 di la parte, 100 di no e non fu presa.
     
      Posto, per li ditti savii e nui ai hordini, mandar a le galie dil trafego ducati 300 di sovention come è [1175] stà mandà a le galie di Barbaria. Have 12 di no, el resto di la parte e fu presa.
     
      Item, fo posto, per li savii dil consejo e di terra ferma, dar al reverendo domino datario, qual ha fato le bolle di le decime, uno presente in arzenti da esserli dato per l'orator nostro di valuta di ducati 100. Have 23 di no et fu presa, et cussì have certe taze.
     
      Posto, per tutti li savii, expedir certi capitoli restava a li oratori di Candia, videlicet che li scrivani si fazi di 4 anni in 4 anni. Item, queli do altri cittadini poveri è stati 5 anni in Candia sono stà fati cittadini sia de niun valor et si observi la leze sopra di ziò: have tutto il Consejo.
     
      Posto, per tutti ut supra, che de caetero in Candia non si possi comprar bandi de Italia per cavarsi di bando di Candia, et cussì sia observato. Have tutto il consejo e fo presa.
     
     
     
      [1499 08 31]A dì ultimo avosto. In collegio, non fo il principe. Vene lo episcopo Brevio di Ceneda al qual li fo leto la lettera di Roma et la parte di pregadi in materia di misier Zuam Bentivoy, et ditto si parte e va a Bologna a questo effecto.
     
      Di campo, di provedadori, di 29. Come a hore 17 la rocha di Caravazo si rese, et cussì quella sera anderano a parlar col castelan et scriverà più copioso, et che opinion lhoro era non si rendendo de mandarli tutti per el fil di la spada, ma a compiasentia di domino Jacomo Secho sono restati, et li hanno tolti a gracia, et ivi sono.