Item, sopra li cavalli lizieri, questi: misier Zuam da Galarà, misier Biasin Crivello, Domenego Torniolo, Zuam Cristophoro da Castelazo, Zuam Antonio Mariolo camerier dil ducha, et Galeazo di Milii. Item, che ditto stratioto si reduse a Milan, dove misier Antonio di Landriam thesorier dil ducha era stà amazato, et che molti fanti erano su la piaza dil castello, et voleano danari; et de lì se dicea Caravazo era perso da le zente di la Signoria, ma si tenia la rocha; et che essendo partido venere di Milan intese che per Milan era posto a sacho, et che francesi doveano venir o a Novara o a Pavia, col esercito et crede che a questo zorno siano pocho lontan da nui.
     
      Vene il conte Antonio da la Concordia, et tolse combiato dal principe, ritorna a Ferrara era qui con le sue done. Et per collegio fo scritto in campo, et se li manda canoni et polvere. Item, fo scritto a Padoa che 7 stratioti fono lì, quali hanno provisione dovesseno immediate cavalchar in Friul.
     
     
      [1499 09 02]A dì 2 settembrio. In collegio non fo il principe. Et prima:
     
      Da Crema, di sier Hironimo Liom el cavalier podestà et capitano, di 28 avosto hore do di note. Come havia mandato do messi in campo francese, zà più zorni, non sono tornati; a hora per uno vien da Milan à inteso misier Galeazo esser alozato in barcho a Pavia et era levato per socorer Alexandria dove francesi erano a campo, et misier Zuam Jacomo Triulzi li mandò a dir per uno trombeta, ch'è l'oficio di uno capitano, era perso alcuni lochi e difender qualche altro.