A ditta hora et giorno. Fu suspeso l'andata de le galie, gripi et provisionati per Lepanto.
      Et a dì ditto, hore 11 de dì. La magnificentia di misier al tutto terminò per suo judicio che ditto socorso se dovesse mandar a Lepanto per assai respeti, et buono era trar al sicuro, et subito mandò a farlo intender a la magnificentia di provedadori, li quali fono di contraria opinione, el magnifico provedador Guoro non ghe era; dinotando a vostra magnificentia che ben che di sopra fazi mencione che le galie et gripi andavano a Lepanto doveano star ad obedientia dil magnifico provedador Venier, dicovi solo li gripi, perhò che subito le galie haveano comissione di ritornar. Pur l'armata turchescha ogni note si levava da lai terra, costigando per aferarsi a la ponta del castel Belveder et intrar nel golfo, ma avanzava pocho, perché poneva il zorno provenza, et convegnivano sortir et poi nui sempre star su le volte etc.
      A dì 17 ditto. A hore do de dì, l'armata di Franza si apresentò sul capo de l'isola del Zante di fora zercha mia 4, subito la magnificentia di misier expedì un altro provedador, che fo el magnifico misier Nicolò da cha de Pexaro, con 20 galie per il remurchio, perhò che cussì acadeva, et foli mandà uno presente de refrescamenti degno et pulito.
      A dì ditto. In sera dicta armata di Franza intrò, et non sorse ma stete su le volte.
      A dì 18. Ne l'alba l'armata nostra andò verso quella, tandem a hore 5 de dì se unissemo, fati li saluti, la magnificentia di misier con el magnifico provedador Malipiero, andorno a visitation dil capitano di ditta armada, recevuti honorevolmente, la magnificentia di misier expose al ditto capitano de ditta armata el bisogno con tante afectuose et degne parole fu possibele, infine li oferse danari per spese et altro etc.