A dì 20 ditto, a hore 3 de dì. Finite et facte tutte le provision necessarie per dover investir, reduta tutta l'armata al vento, el qual solum se aspetava, l'armata inimicha se levò, et con remorchi se tiravano in mare per andar al vento, de subito la magnificentia di misier fece la nostra fazesse lo simile, et in mare posti nulla manchava salvo il vento dil qual eramo sorani; or non parendo più de indusiar rendessemo la volta, li nimici fè lo simile tirandosi a terra. Or se afforzò un pocho de vento assai prospero, tandem, essendo per investir, il vento ne saltò in prova, a li inimici in pope, di che esistimo fusse voluntà divina per li nostri gran pechati, tamen fo combatuto assai rasonevolmente, facta la rivolta de l'armata nostra per la Dio gracia alcun danno, salvo de le caravelle da fuoco come ho dicto se brusò senza proficuo, de l'inimici de sientia 10 legni a fondi senza scampo de persona, salvo alcuni vivi, presi 5 galie, 2 galiote, 3 palandarie, et ne fracassò assai, prexa l'altra volta de la ponta de Chiarenza, et li sortì nui su le volte per star a vento, saltò una fortuna de syrocho con pioza che fo una pietà, tamen per la voluntà di Dio a l'armata nostra non fè danno alcuno, solum che si mez'hora avanti dita nembaiza fusse messa senza dubia l'armata inimicha non l'haria aferrà, et saria andà in dispersia, ma cussì a Dio à piazesto, sit nomen Domini benedictum. Et non obstante hoc una galiaza de l'inimici, la qual havea roto uno penom, et mal conditionata, non potè aferar et tolse il vento in pope, a la qual se mosse driedo 7 di le galie grosse nostre le qual haveriano prexo una armada, et al tempo quando furno apresso per investir andorno a poza, che per Dio ogni picola cossa chi la tochava la mandavamo a fondi, tamen li parse di far cussì: non voglio scriver li nomi de' patroni per esserne de capitani et per altro respeto, ma son zerto per altra via lo intendereti per non essere cossa da tazere.