Da poi disnar, fo pregadi, et fo leto alcune lettere particular che dannava il governo di sier Antonio Grimani capitano zeneral. Item, una di sier Domenego Malipiero provedador di l'armata a sier Fantin suo fradelo: scrivea li desordeni esser seguiti dal zeneral desiderando fusse sier Antonio Loredan vivo. Item, una di sier Simon Guoro, ut supra. Et una di sier Marin Barbo a sier Piero suo fradelo. Et in collegio fo parlato di far capitano zeneral, tamen non fo messa parte.
     
      Da Caravazo, di sier Zuam Antonio Dandolo provedador, di 10. Come era nova, da misier Jacomo Secho, il populo di Milan contentarsi mal di misier Zuam Jacomo et misier Catelan Triulzi. Item, la caxa di l'orator di Ferrara fu posta a sacho. Item, francesi esser aviati verso Como a Chiavena; il roy era zonto a Chier, si aspectava a Milan; et francesi non pol più star in Italia, poi è aquistato quel ducato di Milan; et misier Francesco Bernardin Visconte à mandà in campo da misier Zuam Jacomo [1289] 78 capitoli, li à risposto non haver libertà a conciederli. Item, misier Jacomo Secho andava in campo da li provedadori nostri per ordine lhoro per la praticha l'ha col castelan di Cremona a veder si vogli render.
     
      Da Brexa, di rectori, di 11. Manda le ditte lettere, nulla di novo; et simel di Gradischa dil Zanchani et di Udene dil luogotenente.
     
      Di campo, di sier Marchio Trivixan provedador apresso Cremona. Come il castello di Pizegeton ancora non l'haveano abuto.
     
      Di Cremona, di sier Marco Antonio Morexini el cavalier provedador zeneral et governador di Cremona, di 11. Come quella terra è mal disposta, et non contenti di capitoli fati; et domino Lunardo Botta corse quella mattina da esso provedador dubitando dil populo, voria la Signoria levasse il dazio di menuti, qual dà d'intrada ducati 2000 a l'anno, et a questo modo si aquieteria con questo.