Ancora fo posto la parte, per li consejeri, di risalvar li officii a queli governadori vanno su le galie grosse, e have tutto el consejo.
     
      Et in collegio da li savii, fo aldito uno Sempreviva Sfondrato cremonese, qual presentò lettere dil provedador di Cremona nostro lo ricomandava a la Signoria. Disse era stato capitano di balestieri dil ducha di Milan, voria al presente conduta sotto la Signoria nostra, et la compagnia sua è in hordine et lo aspetta; disse li Palavicini facea 300 homeni d'arme et 500 cavalli lizieri, et a Milan si feva 100 homeni d'arme; et che domino Antonio Maria Palavesim è zenero di misier Zuam Jacomo Triulzi. Or li fo risposto per li savii bone parole, et non era tempo al presente per convenir atender a la guerra dil Turcho, et cussì fo licentiato.
     
     
      [1336][1499 09 22]
      A dì 22 septembrio. In collegio domenega el capitano zeneral sentò a bancho, et in questo zorno la sua galia nuova fo butà in aqua in l'arsenal, et fo terminato marti darli il stendardo et vadi via.
     
      Vene sier Marco Zorzi, sier Nicolò Michiel doctor et cavalier, sier Beneto Zustignan et sier Beneto Trivixan vanno oratori a Milan al re di Franza et tolseno licentia, et cussì la matina partino andono con cavalli et zente d'arme li do novi electi, et fo scritto a Zuam Dulze secretario dovesse restar con lhoro.
     
      Et venuto lettere di Roma di gran importantia di 18 et 19, el principe mandò tutti fuora, et fo lete con li capi dil consejo di X, tamen poi si lexe al pregadi, il sumario sarà di sotto posto.
     
      Vene el Brevio episcopo di Ceneda per nome dil legato dicendo volea esser da poi gran consejo con la Signoria, et che havia cosse importante.