Et cussì quel zorno a hore 22, con el magnifico orator francese et molti cittadini col vexillo di San Marco avanti andoe in ditto castello, essendo perhò stà prima consignati per ditto conte Alvixe et sier Zacharia Loredan li ducati 12 milia et 500 al castelan, et cussì introno in la rocha, dove à posto Zuam Mato contestabele con 200 fanti, et per castelan ditto sier Zacharia Loredan, q. sier Lucha; et che zà per Cremona era stà ditto la rocha tenersi per misier Zuam Jacomo Triulzi, et a le gabelle era zà venuto novità, siché è stà bono spazarsi di haver il dominio dil prefato castello.
     
      Del ditto sier Marco Antonio Morexini et sier Nicolò Foscarini provedadori zenerali, date a Cremona, a dì 23. Come quel zorno a hore 21 feno l'intrà honorificha nel castello insieme coll'illustre governador, orator francese, etc. Fu posto per castelan sier Zacharia Loredan, et Zuam Mato con 200 fanti, et a la guarda di la piaza hanno posto contestabeli con 2500 fanti per esser el populo ancora etc. Et a le porte di la terra hanno posto 300 fanti. Quella forteza è de le principal de Italia, non mancho di quella di Milan; et l'orator francese molto lo laudoe, li à posto dentro monition et tre in quatro passavolanti et do bombarde di reparo, licet ne sia do altre una di le qual fu quella che il conte Francesco otene in la Marcha, et il resto di le artilarie hanno in campo sono di opinion mandarle a Brexa.
     
      Di campo, di sier Nicolò Foscarini provedador, date a San Martin, a dì 23. De l'intrada fece col governador in la rocha di Cremona quella mattina, et come di là di Po erano venuti 6000 guasconi, voriano partido, siché bisognando la Signoria ordeni li averano subito.