Vene ozi sier Domenego Pixani, el cavalier, vien orator dal papa, partito di Rimano. El papa in questo mezo partì, a dì 3 gionse a Urbin, come ho scripto, et a dì 7 partì per Foligno, et a dì 10 gionse a Spoliti; anderà a Perosa e Viterbo, poi a Roma, et intrerà la domenega di Lazara.
     
      [1507 03 14]A dì 14, domenega. Fo gran consejo. Et la matina, sier Domenego Pixani, el cavalier, nominato di sopra, in colegio referì; fo brieve, rimesse al pregadi, et intrò avogador di comun, il loco vachava. Et poi in gran consejo fu fato capitanio in Barbaria sier Alvixe Pizamano, quondam sier Francesco, pratichò im Barbaria, el qual passò di ... balote; et in Aqua Morte sier Francesco Arimondo, fo soracomito, quondam sier Nicolò.
      In questo zorno fo il perdom a San Cassam et Santa Maria Formosa, di colpa e di pena, con [30] penitentieri obtenuti da papa Julio secondo, pontifice presente.
     
      [1507 03 15]A dì XV, luni. La matina, a San Zuane di Rialto fo cantà una solenne messa in canto. Era preparato, perchè sier Hironimo di Prioli di sier Lorenzo, quondam sier Piero, el procurator, levò bancho di scrita, dove era il banco di Garzoni; et sier Alvixe di Prioli, suo barba, era di sora. Vi fu sier Domenego Trivixam, cavalier, procurator, sier Lorenzo Loredan, dil serenissimo, sier Lunardo Mozenigo, sier Piero Balbi, sier Alvixe Venier, sier Alvise da Molin, sier Lunardo Grimani, sier Antonio Trun, sier Anzolo Trivixan, sier Francesco Foscari, el cavalier, et assa' altri patricij et assa' parenti, vestiti di scarlato.