Di Ferara, di 6. Dil zonzer il ducha lì. El qual à parlato col vicedomino di la bona mente dil re versso la Signoria etc. Item, a Bologna è stà lecta, a dì ..., publice una letera dil roy, scrive al ..., come non vol ajutar Bentivoy, imo vol ajutar il papa contra li soi rebelli etc. La qual letera lecta, el popolo comenzò con furia andar al palazo di domino Zuan Bentivoy, ch'era una di le belle cosse de Italia non che Bologna, con camere d'oro, pycture excelentissime etc., et quello tutto ruinoe fino a li fondamenti.
     
      Di Milam, dil secretario. Come aspectavano la christianissima majestà; per la qual cossa si preparava in Milan farli grandissimo honor.
     
      Di Zenoa, dil Condolmer, orator, di 6. Come il re a dì X partiria per Milan; et à concesso a' zenoesi li officij etc. Item, pacifichà il popolo con li zenthilomeni, et fato li officij come prima. Item, ordinato, li zenoesi andono via con †, reliquie etc., debino ritornar sub poena confiscationis bonorum. Item, acordato con zenoesi li diano 200 milia scudi, et zà ne à 'uto 25 milia; et di 6000 sguizari ha, ne ha licentiati 5000 ritornino in lhoro paese, ch'è signal non vol far altro. Item, l'orator nostro ave l'audientia dal re. Et disse assa' cosse di la bona mente di la Signoria nostra versso soa majestà christianissima; et che, zonto a Milan, veria li do solennissimi oratori a visitar soa majestà; si congratulò di la vitoria etc. Il re disse: Ben, ben, sì, sì. Item, parole aute col cardinal Roan, e l'audientia e coloquij.
     
      Da Roverè, di sier Zuan Francesco Pixani, podestà. Di l'esser su quel teritorio 1500 fanti alemani, alozati vicino a Roverè, sul nostro, capitanio domino Leonardo Rauber; et che quelli di la terra havea dubito etc.; et destruze il loco per vituarie.