Item, che alcuni francesi voleno venir a veder questa terra, e manda la lista, numero ..., videlicet alcuni zamberlani dil re e altri monsignori, ut in ea. E altre particularità.
     
      Fu posto, per li savij, dar licentia a sier Zorzi Pixani, dotor et cavalier, et sier Marco Dandolo, dotor et cavalier, oratori nostri al re di Ragon a Napoli, che, partido sarà soa majestà di lì, debino repatriar. Item, sier Cabriel Moro, el cavalier, etiam orator a quella, debi acompagnar soa majestà fino a Saona, et poi ritornar a ripatriar; et sarà expedito il suo successor electo, sier Francesco Corner. Et non andando soa majestà a Saona, vadi il suo secretario, Andrea Rosso, con quella. Et fu presa dita parte.
     
      Fu posto, per i consieri, excepto sier Lunardo Grimani, che sier Francesco Corner, electo orator al re di Ragon, possi venir im pregadi fino el vadi via, juxta il solito, acciò el sia instruto di le cosse. Et il Grimani vuol la parte con questo, etiam sier Andrea Foscolo, va baylo a Constantinopoli, possi venir im pregadi; la qual cossa non è solito. Andò le parte; e fu presa questa dil Grimani.
     
      Fu posto, per i savij, poter tuor di danari di la decima ultimate posta, qual dia esser posta im procuratia, e non spexa si non di ordine di questo consejo; perhò sia tolto certa quantità per mandar a li fanti di Napoli di Romania, e pagar li fanti dil capitanio di le fantarie. Et fu presa.
     
      Fu posto, per li consieri, che sier Domenego Trivixan, cavalier, procurator, el qual va orator in Franza, et cussì sier Pollo Pixani, cavalier, capitanio di Padoa, va suo collega, possino portar con si ducati 400 di arzenti per uno, a risego di la Signoria etc.