Item, altri coloquij etc.; letere secretissime etc.
     
      Fo posto, per li savij, di balotar li condutieri e darli lo augumento, videlicet a li nostri, fino a 300 homeni d'arme, chome alias fu preso; tra i qual per avanti fo dato 50 homeni d'arme al Charazolo, capitanio di le fantarie; et fo dato a molti, chome sarano qui sotto anotati: in tutto homeni d'arme 258.
     
      Item, fu posto mandar danari a tuor 300 stratioti da Napoli di Romania. E fo disputation sopra ziò; parlò sier Carlo Contarini, savio ai ordeni, et molti altri.
     
      Noto, in questi pregadi ultimi fo preso iterum li XV savij deputati al colegio siano cavati di quelli di pregadi 6 mexi, et di la zonta altri 6 mexi, e aldino le appelation di le vendede.
     
      In questa matina Tangavardim, orator dil soldan, fo a la Signoria, acompagnato da quelli sora cotimo; et disse era quasi concluso li capitoli con li deputati, videlicet sier Piero Balbi, sier Alvise Arimondo, sier Alvise da Molin, et usò alcune parole etc.
     
      Vene sier Zuan Marcello, venuto podestà di Chioza, et referì justa il consueto di quelle cosse di Chioza. Laudato de more.
     
      Noto, a dì 29 di questo mexe fo terminato per la Signoria, che sier Marin Zorzi, el dotor, rimasto [87] avogador di comun, per non aversi potuto provar lo scrutinio, tamen ussì, et rimase che la eletion vadi zoso; et cussì fo fato in locho suo.
     
     
      Copia. Per seguir el mio stillo in notificharve tute nove ochorente, che publichamente scriver se pono, me ha parso de non restar di notarvi per questa, ex quo questa matina, venuta nova al christianissimo re, come lo catholico re de Spagna se era moso cum tute sue galie da Zenova per qui, et atrovarse lontan da zercha miglia XII; se mose el reverendissimo cardinal Rhoan cum tre altri cardinali, zoè Phinal, Narbona et Albi; et insieme cum loro monsignor gran maistro et alcuni signori del sangue, cum la più parte de' baroni et zentilhomeni franzesi; et montati su galie 4 sotil, le qual sono a governo de uno capitanio franzese, ha nome Pier Jan, capitanio de questa riviera de Zenova, li andorono incontra per miglia 7, divise tamen le galie, zoè disluntanando una da l'altra per spazio de uno miglio.