El provedador di l'armada ivi non si trova.
     
      Fu posto, per li savij ai ordeni, confinar el capitanio di le galie di ... in galia, a dì ... de l'instante. Et fu presa.
     
      Fu fato 2 sora la reformazion di le decime, in luogo di sier Francesco Bernardo, havia refudà per la età, et sier Lorenzo di Prioli, era intrado sora i atti di sora gastaldi, sier Zorzi Emo, fo cao dil conseio di X, et sier Alvixe Arimondo, fo governador di l'intrade.
     
      [1507 07 14]A dì 14. Fo consejo di X con zonta. Vene sier Cabriel Moro, el cavalier, venuto orator dil re di Ragon, qual si partì di Saona.
     
      [1507 07 15]A dì 15. La matina, ditto sier Cabriel Moro fo in colegio a referir.
     
      Da poi disnar fo pregadi. Et leto le infrascripte letere:
     
      Da Roma, 0 da conto, di 11. Dil zonzer lì uno orator dil re di Ragon, si parte di Napoli, qual al partir dil re fo destinato orator a star a presso la Signoria nostra, di nation cathelano, nominato domino Philippo Feriero, cavalier; et reliqua bona mens pontificis.
     
      Di Germania, di Costanza, di l'orator, di 8. Come, a dì 7, zonse lì domino Camillo de Montibus, stato orator qui, con la risposta. Et scrive sopra questa materia longo, laudato esso orator molto. El qual domino Camillo ritorna; è cosse secrete, ergo etc.
     
      Da Milam, dil secretario. Di le provision [117] fanno francesi. El gran maistro, zonto, manda alcuni milanesi in Franza, per sospeto; fano bastioni, et molte provision per la venuta dil re di romani.
     
      Fo leto le opinion zercha le risposte a li capitoli venuti di Napoli, per le ripresaje; et fo terminato indusiar el zonzer di l'orator, qual di brieve sarà qui.