Item, elezer XX zenthilomeni dil corpo di pregadi e zonta, in 3 camere, a cinque per camera et 5 di rispeto, qualli habino a tansar tutti da ducati 3 fino 50 per testa; et questo si pagi per conto di tansa, ogni volta si metterà decime, zoè tutto quello queste 3 man di savij tanserano sia messo insieme et tolto il terzo, e quello sia valido; e altre parte, ut in ea. E il consejo, non li piacendo tal novità, fe' gran remor; adeo per li savij di colegio fu posto indusiar ad melius consulendum; et non fo più fato altro.
     
      Fu posto per li V savij sora la merchadantia, sier Alvise Grimani, sier Vetor Pixani, sier Andrea Foscarini, sier Lorenzo Capello et sier ..., zerte renovation di spexe, e altre clausule, ut in parte. Le qual non mi estenderò in scriver, adeo perchè il consejo non le sentiva, nisi fosse meglio consultate. Fo tamen balotà, ma per non aver il numero, il doxe si levò et 0 fu fatto.
     
      [1507 09 25]A dì 25. Fo consejo di X. Et in questo consejo fu preso la gratia di sier Andrea da Mosto, quondam sier Piero, qual era bandito di consejo per anni X et fo confinà, qual havia compito il confim et era venuto qui, che 'l possi vegnir a consejo. Questo fo con sier Alvixe Barbarigo, in ajutarlo a far scampar di presom sier Etor Barbarigo, suo fiol, qual era confinà a morir im presom per il consejo di X etc. Nota, dito sier Etor è andato in Spagna col gran capitanio, dal qual à gran favor.
     
      In questi zorni vene sier Donado da Leze, stato provedador al Zante; referì in colegio di quella ixola e di le fabriche etc.