Dio fazi el suo regno eterno, et la sua zente e l'exercito habi vitoria sempre, e che el suo grado sia exaltado di sopra el pianeto di gemini, et el regno et le terre sia impide de la sua bontà e de la sua gratia.
     
      Questi sono i titoli che 'l signor soldan dà
      al serenissimo principe nostro:
      Mandemo questa a la presentia del doxe honorandissimo e savio, integerimo e nobile e potente, Lunardo Loredam, gloria de la generation christiana, beleza de coloro che adorano la croxe, doxe de Veniexia etc., confidanza de tutti che hanno riceputo el batesmo, amigo di re e di soldani, Dio mantegna la sua gratia.
     
      [216]Qui comenza il tenor di la letera:
     
      Avisemo la sua serenità, come è zonta una sua letera a le nostre Porte nobilissime, per man del suo messo, el prudente homo Francesco; et havemo fato lezer, et havemo sapudo la substanzia de essa, zercha el zonzer del nostro ambasador, el prudente, el savio, el magno armirajo, el fidelissimo, el perfetissimo in la sapientia, el nostro Tangriberdi, interpetre. Dio conserva el suo honor, et faza la sua intenzion sia exequida, et ge daga ajuto con i nostri comandamenti nobilissimi. Et che subito zonto a Veniexia, che 'l sia insieme con la serenità del doxe; et che fusse informà la soa serenità de quello che domandamo. Poi la sua serenità ge mostrò al nostro ambasador alguni comandamenti longi e quari, del tempo di soldani pasati, et ne ha rechiesto fusse conservati ditti comandamenti etc. Poi narò da meter i merchadanti de vostra serenità in zime, et menar el consolo et lhoro al Chajero; et quando fonno zonti al Chajero, tutti morino da peste.