A dì 6, fo el dì di la Epiphania. Fo il perdon al Spirito Santo, dura zorni 8. Vene merchadanti in terra di le galie di Baruto, qual è in Histria, tra i qual sier Piero Polani, patron. Ditte galie à fatto ben il cargo, noterò di soto, in tutto colli ...
     
      [1508 01 07]A dì 7. Da poi disnar 0 fu.
     
      [1508 01 08]A dì 8. Fo pregadi. Et leto le infrascripte letere. Et prima:
     
      Di Roma. Come el papa havia cantà la messa, et il cardinal Corner ditto lo evanzelio, el zorno di Nadal. Item, il papa à mandato a donar la spa' e la bareta al ducha di Savoja, solita dar a uno principe in tal zorno. Item, di l'abazia di Cereto, qual per la Signoria fo data al cardinal Corner, par l'orator nostro sij stato dal papa, el qual non vol darla, ma la vol dar a suo nepote, cardinal San Piero in Vincula etc.
     
      Di Milam. Zercha sguizari, et quelli successi.
     
      Di Franza, di l'orator, da Roam. Come si partiva il cardinal et lui subito, per ritornar a Bles, dove è il re. Et alia secretiora.
     
      Di Roverè, Riva, Brexa et Verona, e dil provedador Emo, zeneral, ch'è a Verona. In conformità. Avisi auti da più bande et reporti di exploratori. Et chome a dì 6 si aspetava a Bolzam zonzesse il re, dove si fa la dieta, e tutti erano reduti. Item, a Trento è zonto di novo 500 cavalli et 300 fanti. Item, altre zente tirate versso il Friul. Conclusive, il re vol venir in Italia etc. Item, hanno remandato exploratori, se intenderà il successo.
     
      Di Corphù, dil provedador di l'armada. Lauda molto sier Marco Loredan, capitanio di le galie di Baruto, si à portà ben contra quelle barze di Piero Navaro, e recuperar le charavelle erano prese.