E fo, per pregadi, preso li fosse dà le 3 quarantie. Or l'altro zorno andò: 18 non sinceri, 33 per l'avogador, 41 per il Morexini. Et, questa matina, ditto sier Marin fe' certa oblation, non voler criminalmente andar contra i Pexari etc. Et sier Francesco Orio, non ostante questo, volse mandar la so parte e disputò; e li Pexari aceptò l'oblation. E andò la parte: 4 non sinceri, 33 per l'Orio, et 58 per il Morexini. E questa fo presa.
     
      Fo divulgato in Rialto una nuova notanda. Si dice vien di Mantoa, a Citadela, al signor Pandolfo Malatesta, fo zenero di missier Zuan Bentivoi, li avisava che missier Hanibal Bentivoi, fio di missier Zuane, con zente era intrato in Bologna, e tajà a pezi li Marascoti, ch'è la parte dil papa. Et in circolo di bolognesi diceano, esser stà movesta in Bologna: una parte cridava: Libertà! l'altra: Chiesia! Et che li Marascoti erano fuziti in quel castello, à fato far il papa; la verità scriverò poi.
     
      In questo zorno, da poi disnar, fo consejo di X simplice.
     
      [1508 01 22]A dì 22. La matina se intese, come la sera avanti, hessendo disiolto il consejo di X, se reduse il colegio dil principe, con la Signoria e parte di savij, perhò che, in quel zorno di eri, era alozato qui el general di Humiliati, domino ... di Landriano, fo fradello dil tesorier dil signor Lodovico, qual è foraussito di Milan, homo di gran fazon, sta a presso il re di romani. Et vene come orator di ditto re di romani, con letere credential; et volse audientia, illico zonto. Al qual fo preparato l'habitation a San Zorzi Mazor, per le raxon vechie; et, dicitur, posto barche dil consejo di X, niun li parli.