Item, fu posto una gratia di Jacomo Memo, di sier Michiel, stato preson in Turchia: una stajera, la prima vachante. Fu presa.
     
      In questa matina se intese, come la barza di Piero Navaro, corsaro, era capità in el porto di Brandizo, et era stà retenuta; et cussì esso patron. Ivi è nostro governador sier Hironimo Corner, da Zenavre.
     
      Item, eri se intese, la nave si rupe, e fo trovà legni in mar, fo quella patron Todarin Vassallo etc.: la qual si rompè, tamen si dubitava non fusse la Cadena.
     
      [259] Noto, come al colegio di sier Zuan Antonio Lambardo fo sier Stefano Contarini, consier, sier Nicolò di Prioli, cao di X, sier Alvise Mocenigo, el cavalier, avogador, et sier Alvise Arimondo, inquisitor; et in la sua condanason fo ditto, che li cai di X lo debbi mandar al suo confin etc.
     
      Item, sier Alvise Salamon, de sier Vido, che era castelan a Riva, et fo menato qui, incolpato esser stà a parole con il provedador sier Marco di Renier, examinato per il colegio, et visto la verità, fo per il consejo di X asolto, et iterum ritornò a la sua castelanaria.
     
      In questo zorno a consejo, nel levar dil consejo, atento è la parte dil consejo di X, che niun si pol muover fin non sia stridà li romasi, et atento che uno zovene, sier Salvador Michiel, quondam sier Luca, venuto a questa Santa Barbara a consejo, si levò dil locho dove stava, et andò a uno altro bancho, fo visto dal doxe et mandato a la leze; e fo publichà a consejo questo, sì che tutti starano sentati.
     
      [1508 01 31]A dì 31, fo San Marcho. Se intese esser zonto in Istria la nave, patron Zuan Cadena, che vien di Soria, che si dubitava fusse rota.