Come il re si oferisse venir in qua; à scrito per tutto, vol esser a una fortuna con la Signoria. Item, tien che 'l re di romani farà qualche novità sul nostro stado. Item, aviso di Bergogna, esso re à mandato a tuor zente di là; et che 'l roy mandava monsignor di Obignì, orator in Scocia, per tegnir bona amicitia con quel re, et, volendo, possi aver scocesi. Item, il cardinal Roan, legato, vien versso Lion; et esso nostro orator scrive, la Signoria comandi quello habbi a far, o star lì col re o vegnir di longo. Item, di la morte dil gran canzelier, per la qual morte tutta quella corte e il re è in tribulatione.
     
      Da Milam. Come, a dì 26, partiria missier Zuan Jacomo Triulzi, capo di 400 lanze, ch'è cavali 2400, et fanti 2500, et verà in mantoana, et passerà per il cremonese; unde fo visto, li prepari alozamenti per il passar. Item, che 'l roy averà frisoni.
     
      Di Ferara, di sier Domenego Pixani, el cavalier, vicedomino, qual è indisposto. Avisa, in Bologna esser motion, quelle 4 fameje in arme, Pepoli, Fantuzi, Barzelini et Marsilij etc.; et che a li dì passati volseno brusar certe case de li 40, tra li qual di missier Zuan Campezo. Et questo, perchè disevano lhoro esser stà causa, che non sono stà sublevati di le graveze dal papa. Et par siano tasentati; et mandano oratori a Roma, uno per il legato, l'altro per la comunità, a questo effecto.
     
      Item, li cavali lizieri dil duca di Ferara, numero ..., erano intrati in Bologna, chiamati da quel legato dil papa.
     
      Di Ravena, di sier Lorenzo Capello, podestà, et sier Hironimo Contarini, capitanio.