Item, sia bandito li grimbialli di seda, che mo' si à comenzà a usar. Item, le manege di le vesture sia di braza 4 1/2 di seda, et d'oro braza ..., ut in ea. Et sier Hironimo Pizamano messe star su el preso, excepto sia bandito li grimbiali. Andò le parte: 40 dil Pizamano, et 120 di li do; et questa fu presa. Nota, il Pizamano è molto nominato e mal voluto da donne, per aver fato spexa et cossa che non è stà observato.
     
      Fu fato scurtinio di uno savio dil consejo, in luogo di sier Alvise Venier, è intra' consier, sier Andrea Venier, fo savio dil consejo; e intrò subito. Item, fo fato scurtinio, con pena et boletini, di tre sora le stime. Rimase sier Hironimo Capello, fo cao dil consejo di X, quondam sier Alban, sier Hironimo Quirini, fo savio a terra ferma, sier Tadio Contarini, fo savio a terra ferma, quondam sier Andrea, procurator. Tolti numero 6 e non più.
     
      Restò consejo di X fin horre 4 di note.
     
      Nota, a dì 2 di note fo mandà per il colegio, a hore 4 di note, 12 bombardieri in gran pressa a Verona, tolti dove si à potuto.
     
      [1508 02 04]A dì 4. Fo etiam pregadi. Et leto le infrascripte letere:
     
      Di Verona, di rectori. Con sumarij di nove di Roverè et di exploratori. Dil zonzer il vescovo di Trento a Trento, ritornato di la dieta di Bolzan. E si aspetava il re. Si dice à persone 14 milia, altre relation 7000, altri 30 milia et chi più, unum est [273] stanno con gran guardia, non lasano pasar niun. Item, dil zonzer di altri cavalli et fanti, et che 'l re verà omnino. Il marchese di Brandiburg, qual comprò le raxon di Verona da quelli signori di la Scala, è a Trento, e atende a l'impresa.