Fu posto mandar a Spalato ducati 500, et altre provisione, ut in parte, posta per li savij dil colegio et ...; et steteno fin horre 3 di note, et altro non fu fato cha lezer letere.
     
      Noto, per colegio fo scripto in questi zorni a li provedadori di campo et rectori nostri, justa la parte dil consejo di X, non scrivesseno a soi parenti nove alcune, im pena etc. Questo fo, perchè, per letere dil podestà di Verona, sier Alvise Malipiero, a suo fradello et zenero, se intese il zonzer di l'araldo di lì, avanti la Signoria havesse averto le letere; et etiam per altri respeti, intervenendo il conte di Pitiano, capitanio zeneral nostro, et di vicentini.
     
      [1508 02 16]A dì 16. Sier Zacharia Loredam, venuto capitanio di le galie grosse, referì in colegio; et cargò sier Alvise Loredan, quondam sier Matio, suo soracomito, e dil schiafo el dete a sier Filippo Badoer, etiam soracomito. Et la Signoria lo commesse a l'avogaria ditto sier Alvise; et di questo, prefato sier Zacharia Loredan fo da la terra molto laudato.
     
      Fo fato mostre di li fanti, Pollo da Zara, Stefano di la Moneta, Piero Albanese et uno altro: in tutto numero ...; et pagati im piaza per li savij ai ordeni, et mandati via.
     
      Da poi disnar fo consejo di X; et, per esser solum 3 consieri, 0 feno. Voleano expedir li presonieri [298] di ladri di le galie; et 3 consieri erano amallati, sì che la terra pativa.
     
      Nota. In questo zorno sier Francesco Venier, di sier Jacomo, da Santa Lucia, retenuto, a requisition di suo padre, per li avogadori, perchè 'l dice li mancha ducati 14 milia di la botega, reduto il collegio, li deteno do schassi di corda et una chavaleta; e fo gran che dir per la terra, di la crudeltà dil padre.