Come è venuto lì con le zente regie; et si offerisse a la Signoria nostra per l'amititia e lianza è col roy.
     
      Et nota, si ave una letera, che 'l gran maistro scrive a li do provedadori zenerali novi, andati in campo, la qual, l'ultimo pregadi, sier Andrea Griti mandò la copia a la Signoria, e la autenticha al collega Corner. Per la qual il gran maistro si alegra con lhoro, dicendo non dubitar le cosse procederano bene, e li lauda etc.
     
      Da Milan. Come erano zonti alcuni capi de' sguizari, sì che subito si arà quel numero di fanti X milia.
     
      Fo posto per li savij, tuor ducati X milia di danari di la tansa per li bisogni occorenti etc. Presa.
     
      Fo posto, che sier Hironimo Contarini, electo provedador di l'armada, metti bancho a dì 27 di questo, domenega; et in questo mezo che 'l vadi via, el possi vegnir im pregadi non metando balota. Et fu presa: ave 6 di no.
     
      Fu posto, dar certa conduta di stratioti di Spalato, a uno di quelli; et di li altri far capo uno nepote fo dil conte Xarcho, ut in parte. Presa.
     
      Fu disputato certa materia secreta, zercha scriver a li provedadori a Verona. Et parlò sier Andrea Venier, et li rispose sier Domenego Trivixan, el cavalier, procurator, savij dil consejo. Et fo expedita.
     
      Di Rimano, di sier Zuan Griti, podestà et capitanio. Come de lì intorno è fama, che 'l papa feva zente. Item, à fato uno edito, che niun subdito di la Chiesia toy soldo con niun è con la Signoria, soto pena di rebelion etc. Questo se intese per alcune vie.
     
      Noto. In le letere di Vicenza, dil Corner, provedador, si ave dil zonzer li dil signor Piero dal Monte, con li provisionati novi et vechi, vien di Romagna etc.