Item, uno fante dil consejo di X, Zuan Belli, e le barche del consejo di X a torno; tamen li fo fato le spexe.
     
      [1508 02 29]A dì 29. Fo consejo di X. Et feno li soi capi per marzo: sier Batista Morexini, sier Alvise da Mulla et sier Marco Antonio Loredan; et veneno zoso horre 23, et fo con zonta.
     
      Et in el consejo di X vene letere di sier Zorzi Corner, di 28, hore 16, et 21. Avisa più cosse; et è date le letere a Cao di Ponte, mia ... di Cividal, versso la Piove di Cadore, et lontan di Cividal mia ... Come il signor Bortolo d'Alviano era andato più avanti con le zente, adeo era mia 8 di li nimici, et damatina anderiano a investirli; et vanno con bon animo. Item, che esso signor Bortolo à voluto, il provedador predito rimangi indriedo a far andar le zente avanti: hanno cavali lizieri numero ..., stratioti numero ... provisionati numero ...; e, di [317] l'altra banda, il Sovergnan con persone 4000, et 1000 zonte da poi. Item, hanno per relation, todeschi esser da 7 in 8000, et si fortifichavano in la Piove di Cadore. Et alia, ut in litteris.
     
      Tutta la terra stava in aspectatione di intender quello sequiria. Da una banda l'Alviano promete certa vitoria, da l'altra molti non voria questa zornata, qual è pericolosa. Et questi do zorni, per la Signoria fo mandato a dir a tutti li monasterij observanti, facesseno oratione continue etc.
     
      Item, è da saper, quando pre' Lucha, orator cesareo, veniva zoso di la Signoria, si scontrò in l'orator di Franza, domino Zuan Laschari, et quel di Milan; et non si disseno alcuna cossa, ma pre' Lucha era turbato.