Dimandava trieva per conzar le cosse. Tutti diceva la sua; ma vedendo il prosperar in Friul, non erano di oppinione la mazor parte etc. Fo terminato in colegio ozi consultar la risposta.
     
      Di campo, date a Alla, dil provedador Emo. 0 da conto; non fano 0.
     
      Di Roverè. Come hanno, per exploratori, il re esser a Olmo; et che lo episcopo di Trento à fato 2000 fanti; et quelle zente voleno iterum ritornar a Riva etc.
     
      Dil Friul, dil Corner, provedador, di ... Come haveano fato la mostra lì a Mariam, e dato paga a le zente; li fanti manchavano, et ne aveano pochi di l'aquisto di Codroipo. Item, à lassato domino Piero Querini in Cremons, et altra custodia, come dirò di soto in la letera di l'aquisto. Item, anderano a Goricia etc., ut in litteris.
     
      Di Riva, dil provedador. Avisa, come todeschi erano levati di Archo e Tem, e venuti versso Trento, rimasti certo pocho numero a Tem et Archo. Item, lauda sier Andrea Griti, provedador zeneral, qual di Torri è venuto lì; à fato si atendi a compir le fortification, sì che di nulla temeno.
     
      Di sier Andrea Griti, provedador, date a Torri, a dì 11. Come era stà recuperà la Val di Ledro, in la qual era bon numero di todeschi; videlicet da quelli di la valle medemi, qualli desideravano ritornar sotto la Signoria, etiam da domino Thadio da la Motella, qual con homeni 800, fati di lì via, intrò in la valle; sì che todeschi, vedendo la furia, si partino via. Esso Griti, provedador, fo a Limon, ch'è di la banda di là dil lago; et compito l'aquisto, ritornò di qua a Torri