Et fonno per numero 80; i qualli in questa sera partino con barche fin Monfalcom.
     
      [1508 04 19]A dì 19. Da matina, hessendo eri sera zonto qui uno secretario dil cardinal Santa †, è legato in Germania, a custodia dil qual fu posto Zuan Davanzo et Jacomo Baxejo, secretarij, alozato a San Zorzi, vene questa matina a la Signoria. Quello expose, sapendolo, scriverò di sotto il tutto.
     
      Di Friul si ave letere, dil provedador Corner, di 18, et dil signor Bortolo d'Alviano, di Goricia. Dil prender di la terra, et aver lassato andar li fanti, erano numero 500, et uno capitanio di Lubiana con zercha 30 cavali; et che la rocha non trazeva a lhoro, ni lhoro a la rocha. Et che era ussito di rocha uno citadin di la Patria, di Strasoldo, per veder di tratar acordo etc., si come più diffuse scriverò più avanti.
     
      Da poi disnar 0 fu; e il principe a li officij a San Marco, de more.
     
      [1508 04 20]A dì 20. Da matina vene letere dil Corner, provedador, date in Gradischa, a dì 19, et etiam dil signor Bortolo d'Alviano, date in Trieste. Come esso signor Bortolo havia tratato con quelli di la rocha di Trieste, et acordatosi, intervenendo do capi spagnoli vi sono dentro, esser contenti render dita rocha a la Signoria per ducati 4000, di li qual zà ne hanno auto 200, et mandano suo messo qui ad aver promessa di bancho di 3800 ducati, con questo, che se per tutto il venere santo, che sarà a dì 21, non li verà socorsso dil re di romani, ita che sia suficiente a cazar il nostro, si renderano, con alcuni capitoli di aver e di la persona etc., come di soto più diffuse scriverò. Et cussì, subito zonto, fo aceptati [407] diti capitoli, et fatoli la promessa et la letera, per sier Alvixe Pixani dal banco, di ducati 3800. Et subito si partino; sì che si sta in aspetation di averla.