† Sier Marco Antonio Erizo, el cao di 40, quondam sier Antonio.
     
      [1508 05 11]A dì XI. Da matina fo divulgato esser aviso in la Signoria, il re di romani aver fato tajar la testa a tre soi capetanij et consieri, videlicet uno capitanio di Tyruol, uno era castelan in Cremons, et uno capitanio di le terre franche. Item, aver retenuto uno fio dil conte palatino; e altri avisi di esso re, come dirò di soto.
     
      [464] Da poi disnar fo consejo di X. Et per non pretermeter alcuni sumarij di letere lete eri im pregadi, videlicet di Milan, di Nicolò Stella, secretario; di 3 cantoni di sguizari, qualli dubitano non fazino novità a li confini di Belinzona, contra il stato di Milam.
     
      Item, di sier Zorzi Emo, provedador, date Alla, sollo, copioso. Zercha le cosse di Agresta; et quanto è stà fato et operato etc.
     
      Et ozi vene di diti provedadori, tutti do, date a Alla, a dì 9 da sera. Et advisano consultation fate con li capitanij; e voleno tuor impresa, ma bisogna star 3 dì a meter ordine, videlicet andar a la Piera; et che i nimici erano cresuti da 7000 fanti in suso.
     
      [1508 05 12]A dì 12. Fo letere dil provedador Corner, di 9, date soto Trieste. Avisa, come mandava le zente a li alozamenti verso Goricia e lochi vicini, et lui andava, e il governador, perchè in Lubiana intendeva esser cresuto bon numero di zente soto il duca di Brexvich.
     
      Da poi disnar la Signoria deteno audientia, et perchè veneno X oratori di Trieste, con letere di sier Marco Loredan, governador, la nome di qual sarano qui soto posti. Et fonno a la Signoria, li qual commesse a li savij dil colegio; li qual li alditeno ozi in audientia secreta.