Et fu presa di largo. Et poi, fato il scurtinio, rimase il venerando don Alvixe Contarini, general di Santa Maria di l'Orto, quondam sier Moixè, sì come per il scurtinio qui soto anotato si vederà.
     
      Fu fato etiam eletion di uno castelan a Goricia, in luogo de sier Domenego Gritti, à refudà poi acetado; et rimase sier Marco Antonio Erizo, cao di 40, quondam sier Antonio, era rimasto provedador a Vipao.
     
      Di Goricia, di sier Zorzi Corner, el cavalier, provedador, di 17. Come havia letere di Santa †, di quel Zuan Francesco d'Ascole, provedador. Aspetava li altri fanti e anderia di longo a Vipao, dove intendeva, quel sier Lodovico Contarini, castelan, con li altri, erano stà menati in Lubiana. Et in Vipao è solum 200 fanti a custodia, et ha mandato [479] fin soto le mure per saper questo, e che non vi è alcun a cavalo. Item, che 'l provedador predito havia expedite tre compagnie, il signor Piero dal Monte, Renier di la Sasseta, et Guido Guaim, et mandati versso Vipao, e lui col governador anderia drio etc., ut in litteris.
     
      Di Udene, dil luogotenente. Come preparava le taje di la Patria, per il bisogno. Havia aviso di sier Donado da Leze, provedador, era a Tulmin, che ...
     
      Di campo, di provedadori, sotto la Piera, di 18, hore 8. Come erano stà compito de impiantar l'artilarie a la Piera, ... canoni, ... colobrine, ... sacri et ..., et haveano comenzato a trar.
      Et quelli di la Piera non haviano fato altro cha trazar tutta la note. Et el capitanio de le fantarie havia fato il tutto etc. Et a l'incontro è da X milia todeschi; et altre particularità, come si vedrà in li sumarij di campo preditto.