Item, dil zonzer lì sier Vicenzo Valier, capitanio di Vicenza, et provedador in vicentina, con zente, venuto per Val Sugana, a oferirsi etc.; l'hanno visto volentieri. Et che in quella horra tutto il campo era in arme, perchè vedevano motioni di inimici. Item, dimandano danari; sier Polo Nanni, pagador, à servito dil suo di assa' danari etc.
     
      Di li diti provedadori, di 16, fono lete le letere. Et dil remor fece spagnoli; e altre particularità, come scriverò di sotto.
     
      Noto. In le letere di Friul, dil Corner, provedador. Par molti fanti non hanno voluto tuor danari per le motion di Toscana.
     
      Di sier Hironimo Contarini, provedador di l'armada, date a dì 16, a Trevisa. Come quel zorno a la Cervara, mia X di Pesin, zonto, con le galie, smontò in terra con 400 cavali, et il resto provisionati, di Latantio di Bergamo 900, e altri di le galie fin al numero 2000, et andoe versso Pexin; et a uno castello, chiamato Trevisa, fo combatuto, lhoro difendendossi et scaramuzando, a la fine lo dete a sacho e l'hano auto. Item, che la matina anderia di longo versso Pexim; et ha lassato il governo di le galie a sier Marco Loredan, capitanio di le galie grosse. Et alia, ut in litteris.
     
      Di Monopoli, di sier Stai Duodo, governador, di ... mazo. Avisa, come è venuto in colpho do barze siciliane armate, vanno in corsso; et avisa, acciò si provedi.
     
      Fu posto, per li savij tutti di colegio, ... a sier Marco Loredan, capitanio di le galie grosse bastarde, che, expedita l'impresa di Fiume et Pexim, debbi [480] partirse con l'altra galia bastarda et andar in colpho, persequitando questi tal di mal afar; et li fo mandato lo aviso si havia.