Item, saria bon quelli di Riva non facesseno danno a' soi, et cussì lhoro di Archo e Ten fariano il simile. Et per colegio fo scrito al ditto Contarini facesse questo ordine etc.
     
      Di sier Zorzi Corner, el cavalier, date a Trieste. Dil prender, che si rese, do castelli, ut in litteris; et manda la lista di lochi presi, la qual sarà notada qui avanti, et le ville, et quelli restano a prender. Item, dil suo zonzer lì, e il signor [493] governador. Et manda letere al provedador Contarini di l'armada, li mandi do galie a levarlo per passar a Fiume; et le zente anderano per terra.
     
      Di sier Zustignan Morexini, provedador, date a Goricia. Come à mandà a Lubiana, a inquerir di zente non è adunate. Et che ditto provedador atende a quelle fabriche; et altre occorentie.
     
      Di Udene, di sier Andrea Loredam, luogotenente. Manda uno reporto di uno di Tolmim, che in Lubiana non è 500 fanti.
     
      Noto. Si ha inteso, sier Lodovico Contarini, era in Vipao nostro provedador, et fu preso da' todeschi, è in Lubiana, vivo, con li altri fanti presi; et à scrito al provedador fazi bona compagnia ad alcuni presi, perchè lui à bona compagnia dil duca di Brexvich.
     
      Fu posto, per li savij, atento erano venuti qui 4 oratori di Pexin, qual è rimasti nudi sì dil sacho etc., che siano exenti per anni 5; et voleno esser servitori di la Signoria nostra. Et cussì fo preso la parte.
     
      Di altro locho non fo letere da conto; di campo, di provedadori, 0 da conto.
     
      Fono electi li castelani e provedadori a Cremons et Duin, come dirò. È fati ozi, perchè li 40 compivano.