Item, vene etiam di sier Zorzi Corner, el cavalier, provedador zeneral, date a Trieste, a dì 28. Come havia inteso l'aquisto fato di Fiume; perhò non anderano più a quella parte col campo, ma ben a Postomia.
     
      Di Roma, di l'orator, di 26. Di l'andar il papa a Hostia a piacer; et esser stà morto quel domino Francesco di Narni, deputato andar adjuvar la materia di le trieve a Trento, el qual è stà morto da do soi inimici. Item, il cardinal Pavia si parte e vien legato a Bologna, con zercha 200 homeni d'arme et fanti; et vien per la via di Fiorenza. Item, si dice el cardinal Voltera et el cardinal de ausense si parteno di Roma, per andar in Franza a visitar il cardinal Roam legato.
     
      Di Riva, di sier Zacaria Contarini, el cavalier, di 27. Come missier Zuan Jacomo eri fo lì; e coloquij abuti insieme, et è ritornato in campo. Item, justa l'hordine, ad hore ..., andoe con 30 cavali a Santa Maria di Gratia, dove erano venuti li 4 cesarei, videlicet lo episcopo tridentino, el general di humiliati, di Landriano, milanese, domino Nicolao Firmiano et domino Christoforo Certainer. Et scrive coloquij abuti insieme, da poi le parole generale usate ad invicem; et primo, zercha il mandato hanno dal re. Et quelli disseno aver mandato 6 in solidum a concluder le ditte trieve; et si non bastava, che hanno la sotoscrition dil re et il sigillo, nè fariano altri mandati. E cussì esso orator tolse la copia e disse scriveria a la Signoria, e li mostrò lo amplo mandato lui havia nostro. Et cussì essi deputati ritornono a Archo, e il Contarini a Riva.