Fu posto, per li savij dil colegio d'acordo, excepto sier Andrea Venier et sier Antonio Trun, procurator, risponder in Franza, debino, poi che il re vol cussì, concluder la liga si trata col quinto capitolo, che non si possi far paxe senza voluntà di Franza, ut in eo. Sier Andrea Venier vol star sul capitolo tratato, con nomination solum e non voluntà; sier Antonio Trum vol indusiar a scriver, fin si vedi la conclusiom di le trieve. Fo gran disputation: parlò sier Domenego Trivixan do hore; poi li rispose sier Andrea Venier; demum sier Antonio Trum, procurator. Andò le parte: 19 dil Trun, 42 Venier, 130 dil resto di savij. Fo presa.
     
      [1508 06 06]A dì 6. Fo letere di Riva, di sier Zacaria Contarini, el cavalier. Coloquij fati con missier Zuan Jacomo et col prescidente, qualli voleno aspetar di Franza.
     
      Da poi disnar fo colegio. Et in questo zorno fo retenuto, per il consejo di X, sier Texeo Bolani, quondam sier Zuane, vechio di anni 82, per stronzar monede; et etiam fo retenuti alcuni per sodomia etc. Et accidit uno caso memorando, che la mojer di sier Lunardo Emo, fo Balba, hessendo stata eri a la Sensa fino a tardi, venuta a caxa, li vene fastidio et statim morite; el qual caso à dà che dir a tutta la terra. Etiam è pochi dì che Alvise Trivixan, verier di Muran, disnato di bona voja, da poi disnar li vene uno accidente; etiam morite subito etc.
     
      [1508 06 07]A dì 7. La matina, havendo la Signoria auto letere eri matina, che li deputati elemani è contenti far le trieve con questo capitolo, con li confederati che ànno soldo di la Signoria e di Franza etc., et fo mandato per li oratori francesi, li qualli disseno li piace.