Et la caxon dil numero di cavali fo, perchè fonno asaltati, che li cavalli erano a li alozamenti. Et alias, ut in litteris.
     
      Di Trieste, di sier Francesco Capelo, el cavalier, provedador. Come atende a quelle fabriche; et altre occorentie et provision fate . . . . . . . . . . . . . . . . . . . . . . . . . . . . . . . . . . . . .
     
      Et lezendo le letere, fo chiamà el consejo di X da basso, con li savij che erano reduti, et senza far altro, fo licentiato el pregadi. El qual vene a bonorissima zoso.
     
      [1508 06 09]A dì 9. Da poi disnar fo etiam pregadi. Et leto queste letere:
     
      Di Riva, di sier Zacaria Contarini, el cavalier, di 7. Come in quella matina parlò con il prescidente, et missier Zuan Jacomo Triulzi che vene lì, et li disse la conclusion di le trieve, et quello havia fatto per far la volontà di la christianissima majestà et includer el ducha di Geler, e li deputati mai volseno asentir. Et che 'l prescidente disse, per lui era satisfato, pur che 'l roy fusse contento. Ma missier Zuan Jacomo usò certe parole, dicendo, mai l'haria creduto che la Signoria havesse fato questo senza voluntà dil suo re etc.; et manda li capitoli e il publicar in campo; et che missier Zuam Jacomo disse, e che non si voleva ritrovar a la publicatione, imo si leveria. Esso sier Zacaria cerchò aquietarli; et che ditto prescidente partite per Milam, et cussì il dì sequente faria missier Zoan Jacomo.
     
      Di campo, di sier Zorzi Emo, provedador, di 8. Come, hessendo ritornato missier Zuan Jacomo di Riva, et havendo a dì 7, la matina, publicato la trieva in campo, a la qual esso non si volse ritrovar, imo si perlongò mia 2 lontan con li soi, ma ben fu il nostro capetanio e li provedadori e condutieri: e volendossi partir, butono le tessere a chi tochava acompagnarlo, e tochò a sier Andrea Gritti, fino a Brexa.