Poi si duol, non si habi auto risposta in materia di la liga. Item, di 12, ch'è le ultime, da Lion, ancora il re, non havia inteso la conclusion di le trieve, era andato fuora con la raina; et conclusive, il re è alterado et aspetava intender la conclusion.
     
      Di sier Zorzi Corner, el cavalier, provedador zeneral, di 12, da Postomia. Scrive quello aquisto, replica il modo etc. E lassò lì la compagnia di Piero Corsso, e volea lassar sier Zuan Baptista Zane, ma vol hordine di la Signoria. Item, che hanno, tutti, fino a Lubiana, fuzivano. Item, riceveteno quel zorno la conclusion di le trieve. Le fe' publicar; poi etc. si levò col governador, a dì 14. Di Goricia, scrive di quelle fabriche. Et voria dar la paga a le zente, per aver un bel exercito; et altre occorentie. Item, che 'l signor Bortolo à partiti dil papa, Franza, Fiorenza etc.; e manda di qui domino Zuan Cotta, suo segretario, a tratar. È bon tenirlo et non si lassar ussir di le man. Et alia, ut in eis.
     
      Dil signor Bortholamio d'Alviano, date a Goricia. Scrive di quanto à operato a la Postomia et zercha le trieve; et come vol esser servitor di questa Signoria perpetuo; et zercha la sua conduta, che la ferma compie, et manda il suo Zuan Cotta qui etc.
     
      Di sier Alvixe Miani, capitanio di la riviera di la Marcha, date a ... Scrive l'infortunio suo dil romper il schierazo e anegarsi suo fradello, sier Piero Grioni, quondam sier Marco. Et etiam esser rota la fusta, e lui in aqua, scapolato con alcuni homeni; sì che prega la Signoria voi rearmarlo et ordinar quello l'habi a far.