[1508 08 23]A dì 23. La matina sier Alvixe Capello, venuto provedador di Faenza, fo in colegio et referì di Faenza. Portò il conto di l'intrade etc.
     
      In Rialto fo nova, per via di Zenoa, come le galie nostre di Fiandra, capetanio sier Andrea Bragadim, era im porto di Chades, per dubito di Piero Navaro, capetanio di l'arma' di Spagna, qual era lì a presso; et che le galie nostre ha tolto a soldo una nave de ... Questa nova fe' star molto sospesi nostri.
     
      [1508 08 24]A dì 24. In colegio vene letere, di Ravena e Faenza, esser stà scoperto uno trata' in Bologna, di alcuni, qualli levano zente per la Signoria nostra, tra li qual uno di ...; et che missier Hanibal [619] era propinquo con 500 cavalli. Et scoperto, ditto bolognese era partito; et che un Manzino di Bologna qual alias fo nostro contestabele, era stà preso per il cardinal di Mantoa etc., ut in litteris.
     
      Di Zenoa, dil consolo nostro, di 12 avosto. Avisa di le galie di Fiandra, come ho scripto di sopra; et Piero Navara esser con 4 barze, 6 galie sotil, il resto navilij, fin numero 17; e di la nave tolta per nostri. Et che quelli di Cades hanno asegurà ditte galie.
     
      Di Napoli di Romania, di sier Domenego Malipiero, provedador. De occurrentiis etc.
     
      Fo mandato per l'orator yspano, e ditoli questa cossa. Et scripto immediate per il prefato orator al re, et per la Signoria nostra, dolendosi di questo.
     
      Da poi disnar fo gran consejo. E vene letere di Spagna.
     
      [1508 08 25]A dì 25. Da poi disnar fo consejo di X con la zonta solita. Et feno alcune provisiom, come dirò di soto, per il vender et comprar le voxe; et non fo caxadi niun di li caxadi prima.