Da poi disnar fo consejo di X con zonta.
     
      [1508 10 27]A dì 27. La matina fo in colegio sier Christofal Moro, venuto luogotenente di Cypri, et electo capetanio in Candia, con barba, per esserli morta la moglie, venendo di Cypri, come per avanti se intese, et referì etc.
     
      Da poi disnar fo consejo di X con zonta.
     
      [1508 10 28]A dì 28, fo San Symion. Fo gran consejo. Fato tandem consier in Cypro sier Ulivier Contarini, fo di pregadi, quondam sier Zuane; e pur fo tolto sier Vicenzo Pasqualigo, quondam sier Cosma, ch'è presom a Constantinopoli, la 3.a volta, et passò. Fo etiam fato capetanio di le galie dil trafego sier Zuan Moro, quondam sier Damian. E le galie fo incantade a dì ..., et le ave questi:
     
      Sier Piero Zorzi, quondam sier Nicolò, per lire ...
      Sier Zuan Liom, quondam sier Piero, " " ...
     
      Di Franza, vene letere, di Roan, di l'orator, di 21. Come era concluso le trieve tra il re di romani e il re di Franza, intervenendo Bergogna, zoè quella madama Margarita, fia dil re di romani, che quel ducato governa, et il ducha di Geler, per uno mexe, nel qual tempo si trateria acordo: e che 'l cardinal Roan doveva andar a parlar a la ditta a Cambrai.
     
      Item, di Faenza. Come quelle zente dil papa erano andate a li alozamenti, pur vicino a Faenza; sì che si tien non sarà altro.
     
      [1508 10 30]A dì 30. Consejo di X con la zonta; si dice sono su far provision di arzenti, perchè non vien più arzenti in questa terra, et le monede manchano, et corre assa' ducati bolognesi, che 'l papa fa stampar, i qual non si' la bontà doveriano esser etc.