Item, feno li soi capi.
     
      [1508 11 30]A dì 30, fo Santo Andrea. Fo gran consejo. Et fato 3 consieri di là di Canal. E nota, nel sestier di San Pollo fo tolto, sollo in scurtinio, e in gran consejo quintuplo, sier Bortolo Minio, fo podestà a Padoa.
     
      Capi dil consejo di X di dezembrio: sier Pollo Antonio Miani, sier Alvise Malipiero et sier Pollo Capello, el cavalier.
     
      Vene sier Vicenzo da Riva, soracomito, a disarmar, di mexi 6. Item, sier Marco Loredam, capetanio di le galie grosse, con sier Francesco Contarini, quondam sier Alvise, soracomito, et il Loredan fo in colegio e referì il successo dil suo capitaneato, et si à portà bene.
     
     
      Sumario di letere dil Charoldo, secretario a Milan, a sier Zacaria Contarini, el cavalier, capetanio a Cremona, di novembrio et dezembrio 1508.
     
      Come el prescidente li ha dito, che il re li ha scrito esser in bona et constantissima disposition di perseverar in vita sua in bona confederation et lianza con la Signoria nostra; et questo à comunichato a l'orator è in Franza, e scrito a Laschari et a Milan e a Roma e in altre parte, acciò tutti intenda la sua ferma intentione. Et il prescidente li ha ditto, il re cognosse esser benefitio suo; nè mai se potrà fidar dil re di romani, qual non stà saldo un momento. Item, che questo tractamento de Cambray se concluderà per le cose de Gelder e de Fiandra, e sequirà praeter mentem et intentionem cesareae majestatis. La note di San Martim alcuni francesi, habitavano in caxa de un zenthilomo milanese, ha usato molte insolentie de strepiti, con arme e tamburlini; li rupe la caneva per forza, li bevè il vino e li brusò le bote, e in mezo la corte, con parole molto discortese.