Et cussì fo nominati 7, li qual balotadi, volendo far che 'l consejo zurasse non esser stà pregadi, niun volse zurar, perchè tutti erano stà pregadi, et, perhò li fo dà sacramento desse contra a quelli hanno pregato et observasse le leze. Et cussì niun non passò, et tutti ave più di 150 di no.
     
     
      Nominati colateral zeneral.
     
      Domino Vetor da Martinengo, conte,
      zenthilomo nostro 28
      Domino Antonio Cao di Vacha, padoano 38
      Domino Belpiero Chieregato, dotor,
      cavalier, vicentino 29
      Domino Zuam Jacomo de Vil Marcha',
      vice colateral 29
      Domino Piero Filippo Muronovo, vice colateral ...
      Domino Cosma di Monte, vice colateral ...
      Domino Zuam Marco de Arzignan,
      vice colateral a Brexa ...
     
     
      [1508 12 03]A dì 3. Fo gran consejo. Et vene sier Almorò Pixani, stato sopracomito mexi ..., et vice capetanio dil colfo; et la matina fo in colegio a referir.
     
      Noto. In questi zorni vene alcuni animali in questa terra conduti da ...
     
      [1508 12 04]A dì 4. Da poi disnar fo pregadi. Et leto le infrascripte letere:
     
      Di la Zefalonia, di sier Antonio da Mulla, provedador, di 27 septembrio, vechie. Come à aviso, per navilij vien di streto, capitati lì, per li qual si ha il signor turco star mal, et non pol viver molto per il mal l'ha; et che janizari erano sublevati, e fevano danni, perchè volevano veder il suo signor; et anche altre nove di la Morea. 0 da conto; è cosse vechie.
     
      Di Napoli, dil consolo. Come à parlato al Sexa iterum, qual dice verà per ducati 400 a l'anno, ferma di 3 anni. Item, il parlamento è risiolto, et sono mal contenti, convienneno pagar quelle imposition per fuogo di carlini 3; sì che il regno è distruto.