Etiam, per ditto consejo di X, secretissime mandono 30 barche ben armate con zente a Rimano, le qual perhò andono a Ravena; et non bisognando, non andono più oltra e ritornò.
     
      [1508 12 12]A dì 12. Da poi disnar fo pregadi. Et leto le infrascrite letere:
     
      Di Ravena, Faenza et Rimano, in conformità, X letere. Di successi dil cardinal Pavia, qual con 600 cavali andò di Forlì a San Archanzolo, poi a Cesena. E dil comandamento dil ducha di Urbin, di star preparate zente, et la causa, come ho scrito di sopra. Et a Perosa li 6000 fanti, fato le monstre, ch'è perhò l'ordinanza. Item, dil zonzer Zuan Paulo Manfron, Carlo Secho, Zuan Griego, et li Naldi, a Rimano con 600 provisionati. Item, il retor di Rimano à bon animo, à fato molte provisione e comandà molti homeni per custodia etc. Et a dì 7 zonse il cardinal Corner da ditto cardinal di Pavia, partito di qui, et vano insieme a Roma. Item, che ditto cardinal li mandò lo episcopo di Famagosta, da parte dil cardinal Pavia, lì a Rimano, a dimandar il passo per transito. E il podestà rispose, era contentissimo, et vengi a piacer di sua reverendissima signoria; ma, per esser terra nuova, el prega alozi in la terra sollo la sua persona e la fameja, che sarà molto acharezato. Item scrive, venendo, li farà honor, li manderà zente contra armate, et lui a la porta, et li presenterà per ducati 25 etc., ut in litteris. El qual cardinal dovea passar a dì ...
     
      Di Milam, dil secretario, di 7. Uno aviso di Zenoa, che 'l duca di Sibilia, con certi altri signori, erano sublevati contra il catholico re, et etiam il gram capetanio fuzido etc.