Di quelle cosse 0 da conto.
     
      Di Roma, dil Badoer, orator, di 3. Come il Pixani erali ritornà la febre. Il papa volea montar nel Tevere e andar in galia a Cità Nova, a veder certa cossa, e poi Hostia.
     
      Di Cao d'Istria, di sier Hetor da cha' Tajapiera, podestà et capetanio; manda una letera auta di Damian di Tarsia. Di quelle cosse di Frangipani et Bot Andreas, qual si va risolvendo, per certo matrimonio fato di una vedoa etc., ut in eis.
     
      Fu posto, per li consieri, far un salvoconduto a li signori Hestor et Hironimo di Manfredi, tolseno per moglie le do fie de sier Andrea Contarini, qualli sono debitori di varie persone, et non ponno pagar, per mexi 6 siali fato salvoconduto. Et preso: 17 di no.
     
      Fu posto, per li ditti, che 'l provedador di Fiume possi spender ducati 15 per fabricha dil palazo etc. Et fu preso.
     
      Fu posto, per li savij, elezer 3, dil numero di 20 fono electi per le cosse di la rota Sabadina, qualli siano balotadi in colegio et vadino a exequir quanto è stà diliberato, ut in parte. Et fu presa; et cussì poi elexeno.
     
      [688] Fu posto, per li savij dil colegio, excepto sier Andrea Gritti, savio dil consejo, sier Alvise di Prioli et sier Alvise Mocenigo, el cavalier, savij a terra ferma, atento il signor Bortolo d'Alviano, governador zeneral nostro, à più volte richiesto li sia deputà dove si habbi a pagar di ducati 30 milia à a l'anno per stipendio, perhò li sia deputà la camera di Verona per ducati 20 milia, et quella di Vicenza per ducati 10 milia. Contradise sier Andrea Gritti, dicendo è bon limitar prima le zente, et la camera di Verona e Vicenza è cargada tanto che la non puol, et havemo spesa ducati 249 milia a l'anno, et la limitation di le camere è solum ducati ..., et perhò è bon regolar le zente; li rispose sier Zorzi Emo, savio dil consejo.