Rimase sier Andrea Valier, el 40, quondam sier Antonio, fo primo balotado, e non era im pregadi, di una balota di sier Zuan Francesco Zustignam, quondam sier Beneto, qual à un gran parentado.
     
      Fu fato eletiom di 3 provedadori sopra le vendede, juxta la parte. Rimaseno sier Andrea Badoer, fo ai 5 savij, quondam sier Zuane, sier Antonio da Canal, fo a la chamera d'imprestidi, quondam sier Piero, et sier Andrea da Mosto, fo cao di 40, quondam sier Piero.
     
      Fu fato scurtinio di do executori. Rimase sier Zorzi Emo, fo savio dil consejo, et sier Hironimo Capelo, fo cao dil consejo di X, el qual acetò et l'Emo refudoe. E iterum fato uno scurtinio, rimase sier Lunardo Grimani, fo savio dil consejo, el qual non era im pregadi. Sotto, sier Marco Antonio Loredan, fo cao dil consejo di X, quondam sier Zorzi; stete fin hore 4.
     
      [1509 01 26]A dì 26. La matina l'orator yspano, qual è stato amalato, fo in colegio. E nota, che 'l re di Spagna non è in questo acordo, e vien divulgato non vol esser etc.
     
      Fono electi 2 a fortifichar li passi, justa la parte. Et rimase, primo sier Alvise Dolfin, fo podestà e capetanio a Cividal di Bellun, quondam sier [724] Dolfim, qual anderà in Cadore, Butistagno etc. Item. l'altro, che dia andar in Friul, non passò; Jo fui nominato. E iterum fato scurtinio, nium non passò: si farà un'altra volta.
     
      Da poi disnar fo consejo di X con la zonta.
     
      In questa matina in Rialto fonno incantade le galie di Barbaria: l'una ave sier Zuan di Garzoni, quondam sier Marin, procurator, per ducati 50, grossi uno; l'altra sier Luca Minio, quondam sier Nicolò, per suo fiol Tiberio, è patron im Barbaria, per ducati 180; è maona.