Fo spazà Christofal di Calabria con 500 fanti, ai qual di qui è dato 1/2 paga, e, zonti dove voleno, l'altra meza. Fo scripto per avanti al conte Bernardin, el fiol vadi a Cremona con la suo conduta; et cussì il conte Alvise Avogaro etc.
     
      Fo spazà etiam Christofal di Calabria, fo contestabele soto il signor Lodovico, con 500 fanti, et dato li danari li vadino a far.
     
      Di Goricia e Roverè. Chome quelli dil conta' di Tirol erano disciolti in la dieta fata a Bolzan, e messo a far una dieta a Vormes, a dì ...; et hanno promesso al re dar 5000 fanti fuora dil paese, et nel paese di Tirol, per conservation di quello dil re di romani, fanti 20 milia etc., ut ...
     
      Di Milam, di 3, dil secretario. Di certo bancheto fato per missier Zuan Jacomo Triulzi, el qual disse al nostro secretario, non andasse per non far sospetar. Poi lo mandò a invidar, e il secretario fense esser amalato e non andò. Item, di Franza non ha 0 di l'orator nostro, chome non fusse al mondo. Item, è stà preparà mostre di le zente francese, e multa dicuntur contra Venetos. Lui secretario di hora in hora aspeta la licentia. Il gran maistro partiva per Milan a dì 4, et poi il re a dì 7 di Bles per Milam; et che monsignor di la Peliza, è lì a Milan, prepara le ordinanze.
     
      A dì 7. Fo colegio di la Signoria e savij. Dicitur è letere di Brexa, hanno electi ... oratori a la Signoria, et vien a oferir fanti X milia, pagati dil suo, per mexi 3; tamen fo dito esser oferta zeneral. Item, si dice Bergamo à oferto 7000 fanti.
     
      Di Cremona, di ... Come cremonesi hanno electo 6 citadini nel suo consejo a presso li rectori, a far ogni provisione; et hano gajardo animo a difendersi, volendo meter la vita per questa illustrissima Signoria etc.